Nel Amaro
Manuel Amaro Fernández Álvarez, más conocíu como Nel Amaro, nació en 1946 en Quentuserrón, un llugar de La Güeria San Xuan, en Mieres. Yera fíu de César Fernández, ún de los protagonistes de la fuelga de 1962, y d’Encarna Álvarez, militantes entrambos del PCE, y hermanu de Mariluz Fernández. Toos ellos sufrieron cárcel pola so implicación política y el mesmu Nel Amaro pasó delles veces peles prisiones franquistes.
Anque nos últimos años de la so vida’l so trabayu creativu centrábase na poesía visual y nes performances, Nel Amaro empezó como autor teatral, primero en castellanu y más tarde n’asturianu. Ye a últimos de la década de los setenta del sieglu pasáu cuando empieza a abrir camín al teatru nuevu n’asturianu, dando a conocer obres onde se mez la vanguardia y la denuncia social, como Xénesis o alborá de la concencia (1978), Glayíos nueos, vieya murnia (1979) o L’únicu rebalbu (1980). Antígona, por exemplu, que ganó’l premiu de teatru de l’Academia de la Llingua Asturiana en 1991, foi otru pasu importante nes posibilidaes del llinguaxe teatral n’asturianu. Les manes en caxón (2003) foi la so última publicación teatral.
De formación autodidacta, tamién foi narrador y poeta. N’asturianu, publicó los llibros de cuentos Prietu Jazz (1993) y Na borrina (1993), y les noveles ¡Adiós Dvorak! (1990), Novela ensin títulu (1991), L’últimu del pelotón (1994), ¡¡¡Falanxista!!! (1995) y Entós, cuando ñevaba (2002). Obres poétiques n’asturianu publicaes en volume son Y tu, qu’entoncies nun yeres, tampocu, l’Anna Karina de les películes de Jean Luc Godard (1990), Diariu de polizón (1990), Poemes de San Francisco (1993), Pruebes d’autor (1994) y Cementeriu cívicu (1999), anque tien una montonera de poemes espardíos per fancinos, fueyes volanderes y revistes, munches d’elles fundaes por él. Foi l’introductor de la poesía visual n’Asturies y el so nome figura na antoloxía Poesía visual española.
Nel Amaro ganó premios como’l Soto Torres de teatru, Xana del Bable, Conceyu d’Uviéu, Premiu Nacional de Cuentos El Llano, Teatru costumista de Candás... Morrió n’Uviéu’l 4 d’abril del 2011, a los 64 años d’edá.
