KAMANTE TEATRO
Con M mayúscula

Trayectoria
Kamante Teatro ye una compaña especializada en teatru pa neños y neñes, qu’escomienza l’andadura profesional en 1990.
Dende l’empiezu combinaron la producción d’espectáculos col desarrollu d’un modelu pedagóxicu propiu sobre la práctica teatral.
En Kamante Teatro foron construyendo un llinguaxe teatral propiu, basáu na poética de lo cenciello, nacida de la confrontación d’actor/actriz y oxetos, la precisión y la espontaneidá, orixinando espectáculos que se desarrollen formalmente baxo un sellu d’innovación.
El so compromisu principal colos neños y les neñes, espectadores de güei, ye “la busca de plantegamientos artísticos nuevos baxo una premisa de calidá”.

Sinopsis
Arturo y Clementina yeren dos tortuguines moces, allegres y despreocupaes. Una tarde, ente llugues y el gorgolitiar de los paxarinos, conociéronse… ¡y nun tardaron en namorase! Decidieron que lo meyor yera casase darréu. Clementina tenía munchos suaños y pensaba no felices que diben ser xuntes.
De mano too yera maraviyoso, pero col pasu’l tiempu los suaños de Clementina fueron esfumándose, como aquelles primeres llugues. ¡Yá nun podía siquiera salir de casa! Arturo empezó a pensar namás nél mesmu, y a cargar a la muyer con milenta “regalos” qu’a ella nun la facíen nada feliz.
Clementina sentíase tonta y aburrida pero, un día, mentes Arturo nun miraba, decidió dir a pasiar…

Ficha técnica
Dramaturxa testual: Luisa Aguilar y Luis Vigil
Traducción al asturianu: Xosé Firmu García Cosío
Dirección: Luis Vigil
Ayudantía de dirección y producción: Marta Vicente
Enriba l’escenariu: Ici Díaz y Enrique Dueñas
Música orixinal: Verónica R. Galán
Diseñu illuminación y escenografía: Luis Vigil
Asesoría figurinismu: Manuela Caso

CARLOS ALBA, CELLERO
Les madreñes vacíes

Trayectoria
Carlos Alba, Cellero, ye un actor especializáu en trabayos unipersonales de teatru narrativu y de títeres, xuglaría, monólogu y cuntacuentos. Nel añu 2022 entama col so proyectu de compañía teatral La Compañía del Alba.
Cola obra d’actor y títeres Xuan Soldáu algamó’l premiu FETEN 2015 a la meyor adaptación del testu, con Llázaro de Tormes fíxose col Nel Amaro de teatru profesional n’asturianu nel 2017 y con Les madreñes vacíes foi nomináu a meyor obra pa públicu familiar y meyor actor nos premios Oh de les artes escéniques asturianes na edición del 2018. Tamién recibió, nel 2019, la distinción Urogallo, otorgada pol Centru Asturianu de Madrid, na categoría de Llingua Asturiana.

Sinopsis
Andando pel mundu, un xuglar atópase con Miguelín, un neñu al qu’esti añu nun-y dexaron nada los reis magos. Dambos entamen un viaxe hacia Oriente. Ellí van descubrir qu’a Gaspar, Melchor y Baltasar secuestrólos el Señor de la Guerra, y van tener que los lliberar. Una fábula prestosa interpretada por un xuglar que remana los títeres, la música y la palabra poética pa facenos viaxar cola imaxinación.

Ficha técnica:
Autor: Carlos Alba, Cellero (partiendo d’un poema de Miguel Hernández)
Interpretación: Carlos Alba, Cellero
Dirección escénica: Alexander Curcic
Diseñu y realización de marionetes: Olga Zeceva Curcic
Diseñu y técnicu d’illuminación: Rafa Echevezt
Maestra de guitarra barroca: Noemí G. Sagüillo
Diseñu y realización de vestuariu: Nati García y Olga Zeceva Curcic
Diseñu de cartel y cartafueyos: Goyo Rodríguez
Igua d’escenografía: Olga Churchic (Taller de Teatru Plus), Vanessa Peña y Goyo Rodríguez / Luthier: Carlos Ardura
Videu: Omar Tuero / Semeyes: René Estébanez

FACTORÍA NORTE
Aventurina, l’ablana

Trayectoria
Factoría Norte ye una productora y compañía profesional de teatru y danza asturiana qu’entama la so trayectoria en 1998.
Dende entós impulsó la creación de más d’una trentena montaxes n’asturianu y castellanu que xunen artes plástiques, títeres, teatru, música  y danza, pa la infancia y la mocedá. De cara al públicu adulto, tamién apostó pola interdisciplinariedá artística nes sos propuestes escéniques.
Ente otros premios que tien nel so haber, nel 2019 Factoría Norte algamó’l premiu «Nel Amaro» de Teatru profesional cola producción Les rellaciones peligroses.

Sipnosis
Aventurina, l’ablana ta mui arguyosa del sitiu del que vien. Présta-y relacionase colos collacios y collacies de la naturaleza.
La brisa carícia-y la piel canela, los páxaros enllénen-y de melodía los oyíos y l’agua xuxuria y da vida a esta familia estupenda que nun dexa de medrar… pero un día dalgo sucedió… Aventurina garró camín a la gueta l’aventura y deprendió daqué importante pel camín. ¿Quieres saber qué?
Interpretación, títeres y canciones van a ser los recursos d’esti viaxe tan imaxinativu cola nuesa protagonista.

Ficha artística y técnica
Autoría/dirección: Carmen Gallo, Pili Madievo y Sheila Montes
Intérprete: Sheila Montes
Escenografía, vestuariu y atrezu: Factoría Norte
Títeres: Os Monicreques de Kukas/ Gonzalo Mateos
Traducción al asturianu: Marián García Rodríguez
Videu: La Reciella
Técnicu soníu/illuminación: Gonzalo Mateos
Producción: Carmen Gallo

NUN TRIS PRODUCCIONES
La sierva patrona

Trayectoria:
La compañía, fundada en 1997 y con más de cincuenta espectáculos estrenaos, caltién una llinia de producción na que la música y en concreto la llírica gocia d’abonda presencia. Como exemplos de recién pueden mentase Xuanón namoráu, L’audición,  La Promesa o la ópera de Mozart Los amorinos de Bastián y Bastiana. Pa eso cunten con cantantes, preferentemente mozos, que puedan asumir con solvencia roles esixentes técnicamente.
Gran parte de los montaxes de la so producción ye n’asturianu, buscando un teatru qu’arrespuenda al contestu social, históricu, cultural y llingüísticu de la nuestra comunidá.

Sinopsis
La obra que se propón tien un argumentu cenciellu, un xuegu amorosu simpáticu ente una criada y el so vieyu patrón, que resulta burlláu  pola primera. Como obra dirixida a un públicu familiar, ye una propuesta amable, d’espíritu humorísticu y llixeru y que se val de la cencellez na propuesta escénica, na qu’intervienen bien pocos personaxes y na que nun son necesarios grandes entueyos escenográficos.

Ficha técnica
Serpina: Vanessa del Riego.
Uberto: Óscar Hernando Castillo.
Vespone: Inma Rodríguez.
Música: Mario Álvarez.
Dirección d’escena y versiones: Antón Caamaño.
Escenografía, lluz y vistimienta: Producciones Nun Tris.
Ayudante de dirección: Inma Rodríguez.
Diseñu de publicidá: Ana Arango.